Back to Home
ഇല്ലിനോയി: 2025 മാര്ച്ച് 30 ഞായറാഴ്ച ഇല്ലിനോയിയിലെ സ്കോക്കിയിലുള്ള നോര്ത്ത് ഷോര് ഹോളിഡേ ഇന്നില് മുസ്ലീങ്ങള് ഈദ് ഉല്ഫിത്തര് ആഘോഷിച്ചു.
സ്ത്രീകളും പെണ്കുട്ടികളും വര്ണ്ണാഭമായ പരമ്പരാഗത വസ്ത്രങ്ങള് ധരിച്ച്, കൈകളില് മൈലാഞ്ചിമൊഞ്ചോടെ അണിനിരന്നു. ഉസ്താദ് ഒമര് ലത്തീഫ്, ഇമാം മാലിക് മുജാഹിദ്, മുഫ്തി സല്മാന് പട്ടേല് എന്നിവരുടെ നേതൃത്വത്തില് പ്രാര്ത്ഥനങ്ങള് നടന്നു.
കമ്മ്യൂണിറ്റി നേതാവും എഫ്ഐഎ മുന് പ്രസിഡന്റുമായ ഇഫ്തിഖര് ഷെരീഫ്, ദാനധര്മ്മത്തിന്റെ പ്രാധാന്യവും റമദാനിന്റെ പ്രാധാന്യവും ഊന്നിപ്പറഞ്ഞു.
കുടുംബം, ആരോഗ്യം, വിശ്വാസം എന്നിങ്ങനെ അല്ലാഹുവിന്റെ അനുഗ്രഹങ്ങളില് നന്ദിയുള്ളവരായിരിക്കാന് ഇമാം മാലിക് മുജാഹിദ് തന്റെ പ്രഭാഷണത്തിലൂടെ വിശ്വാസികളെ ഓര്മ്മിപ്പിച്ചു. റമദാന് വ്രതം മാത്രമല്ല, ആത്മീയ നവീകരണവും അച്ചടക്കവും ആത്മനിയന്ത്രണവും പകരുന്നു എന്നും അദ്ദേഹം ഊന്നിപ്പറഞ്ഞു. ഖുര്ആനിലെ ഒരു വാക്യം എങ്കിലും ദിവസവും വായിച്ച് മനസ്സിലാക്കാന് അദ്ദേഹം യുവാക്കളെ പ്രോത്സാഹിപ്പിച്ചു. പലസ്തീന്, മധ്യ ആഫ്രിക്ക, ഇന്ത്യ എന്നിവിടങ്ങളിലെ മുസ്ലീങ്ങളുടെ പോരാട്ടങ്ങളിലേക്കും അദ്ദേഹം ഏവരുടെയും ശ്രദ്ധ ക്ഷണിച്ചു, നീതിക്കുവേണ്ടി നിലകൊള്ളാനും ഉത്തരവാദിത്തം ഏറ്റെടുക്കാനും സമൂഹത്തെ പ്രേരിപ്പിച്ചു. സര്വ്വശക്തന് എല്ലാ അടിച്ചമര്ത്തലുകളും കാണുന്നുണ്ടെന്നും, മാറ്റത്തിനും സമൂഹത്തിന്റെ ഉന്നമനത്തിനും വേണ്ടി പ്രവര്ത്തിക്കേണ്ടത് നമ്മുടെ കടമയാണെന്നും അദ്ദേഹം എല്ലാവരെയും ഓര്മ്മിപ്പിച്ചു.
അമേരിക്ക പോലെ വൈവിധ്യമാര്ന്ന സമൂഹത്തില് ഈദ് വെറുമൊരു ഉത്സവമല്ല, ഐക്യത്തിന്റെ പ്രതീകമാണ് എന്നും അദ്ദേഹം പറഞ്ഞു. ഈ വാര്ഷിക ഒത്തുചേരലിനും ഈദ് പ്രാര്ത്ഥനകള്ക്കുമായി ഹോളിഡേ ഇന് ഹോട്ടലില് ഇടം നല്കിയ ആസാദ് ലഖാനിയുടെ വിശാലമനസ്സിനും അദ്ദേഹം നന്ദി അറിയിച്ചു. ആഘോഷം സുഗമമായി നടത്താന് വോളന്റിയര്മാര് വഹിച്ച പങ്കിനെ അഭിനന്ദിക്കുകയും ചെയ്തു.