Times of American Malayali
Back to Home
കൊച്ചി: ജനുവരി 11, 12, 13 തീയതികളില്‍ കൊച്ചിയിലെ ഗ്രാന്‍ഡ് ഹയാത്തില്‍ നടക്കുന്ന ഫൊക്കാന കേരള കണ്‍വന്‍ഷന്‍റെ ഒരുക്കങ്ങള്‍ അവസാനഘട്ടത്തിലേക്ക് കടക്കുന്നതായി ഫൊക്കാന പ്രസിഡന്‍റ് ഫിലിപ്പോസ് ഫിലിപ്പ്, ജനറല്‍ സെക്രട്ടറി സന്തോഷ് നായര്‍, ട്രഷറര്‍ ആന്‍റോ വര്‍ക്കി എന്നിവര്‍ അറിയിച്ചു.
അമേരിക്കയിലെയും കാനഡയിലെയും മലയാളി സമൂഹത്തെ കേരളവുമായി കൂടുതല്‍ ശക്തമായി ബന്ധിപ്പിക്കുക എന്ന ലക്ഷ്യത്തോടെ വിവിധങ്ങളായ പരിപാടികളാണ് ഇത്തവണത്തെ കേരള കണ്‍വന്‍ഷനില്‍ ഫൊക്കാന ആസൂത്രണം ചെയ്തിരിക്കുന്നത്. പ്രവാസി മലയാളികളുടെ സാമൂഹിക, സാംസ്കാരിക, ബിസിനസ് മേഖലകളിലെ സംഭാവനകള്‍ക്ക് കൂടുതല്‍ പ്രാധാന്യം നല്‍കുന്ന രീതിയിലാണ് പരിപാടികള്‍ ക്രമീകരിച്ചിരിക്കുന്നത്.
കണ്‍വന്‍ഷന്‍റെ പ്രധാന ആകര്‍ഷണങ്ങളിലൊന്നായി ബിസിനസ് മീറ്റ് സംഘടിപ്പിക്കും. കേരളവും പ്രവാസി മലയാളി സമൂഹവും തമ്മിലുള്ള ബിസിനസ്, നിക്ഷേപ സാധ്യതകള്‍ ചര്‍ച്ച ചെയ്യുന്നതിനും സംരംഭകരെയും വ്യവസായ പ്രമുഖരെയും ഒരുമിച്ച് കൊണ്ടുവരുന്നതിനും ബിസിനസ് മീറ്റ് വേദിയാകും. കേരളത്തിലെ വിവിധ മേഖലകളിലെ പ്രമുഖ വ്യവസായികളും ബിസിനസ് നേതാക്കളും പരിപാടിയില്‍ പങ്കെടുക്കും.
സാംസ്കാരിക സമ്മേളനവും കണ്‍വന്‍ഷന്‍റെ പ്രധാന പരിപാടികളില്‍ ഒന്നായിരിക്കും. കേരളത്തിന്‍റെ സമ്പന്നമായ സാംസ്കാരിക പൈതൃകവും പ്രവാസി മലയാളികളുടെ കലാസാംസ്കാരിക സംഭാവനകളും സമ്മേളനത്തില്‍ അവതരിപ്പിക്കും. കലാകാരന്മാരുടെയും സാഹിത്യസാമൂഹിക രംഗത്തെ പ്രമുഖരുടെയും സാന്നിധ്യം പരിപാടിക്ക് കൂടുതല്‍ മാറ്റുകൂട്ടും.
കാലിക വിഷയങ്ങളും മാധ്യമ രംഗത്തെ പുതിയ മാറ്റങ്ങളും ചര്‍ച്ച ചെയ്യുന്നതിനായി മീഡിയ കോണ്‍ഫറന്‍സും സംഘടിപ്പിക്കുന്നുണ്ട്. മാധ്യമപ്രവര്‍ത്തകര്‍, മാധ്യമ സ്ഥാപനങ്ങളുടെ പ്രതിനിധികള്‍, സാമൂഹികസാംസ്കാരിക രംഗത്തെ പ്രമുഖര്‍ എന്നിവര്‍ പങ്കെടുക്കുന്ന മീഡിയ കോണ്‍ഫറന്‍സ് കേരളവും പ്രവാസി സമൂഹവും തമ്മിലുള്ള ആശയവിനിമയം കൂടുതല്‍ ശക്തമാക്കുന്നതിനുള്ള വേദിയാകും.
സ്ത്രീകളുടെ പങ്കാളിത്തത്തിനും നേതൃത്വത്തിനും പ്രത്യേക പ്രാധാന്യം നല്‍കിക്കൊണ്ട് വുമണ്‍സ് ഫോറം മീറ്റിംഗും കണ്‍വന്‍ഷന്‍റെ ഭാഗമായി നടക്കും. സ്ത്രീകളുടെ സാമൂഹിക, സാംസ്കാരിക, തൊഴില്‍ മേഖലകളിലെ മുന്നേറ്റവും അവരുടെ നേതൃത്വ സാധ്യതകളും ചര്‍ച്ച ചെയ്യുന്നതിനൊപ്പം വിവിധ പദ്ധതികളും പരിപാടികളും ആവിഷ്കരിക്കും.
ഇതിനുപുറമെ, പ്രവാസി മലയാളികളുടെ പുതിയ തലമുറയെ കേരളത്തിന്‍റെ ഭാഷയുമായും സംസ്കാരവുമായും കൂടുതല്‍ അടുപ്പിക്കുന്നതിനായി ഭാഷാ സാംസ്കാരിക പദ്ധതികള്‍ക്കും കണ്‍വന്‍ഷനില്‍ പ്രത്യേക പ്രാധാന്യം നല്‍കും.
കേരളത്തിന്‍റെ വികസനത്തില്‍ പ്രവാസി മലയാളികളുടെ പങ്കാളിത്തം വര്‍ധിപ്പിക്കുക, കേരളവും പ്രവാസി സമൂഹവും തമ്മിലുള്ള ബന്ധം കൂടുതല്‍ ശക്തമാക്കുക തുടങ്ങിയ ലക്ഷ്യങ്ങളോടെയാണ് കണ്‍വന്‍ഷന്‍ സംഘടിപ്പിക്കുന്നതെന്ന് ഫൊക്കാന ഭാരവാഹികള്‍ അറിയിച്ചു.
മൂന്നു ദിവസങ്ങളിലായി നടക്കുന്ന കേരള കണ്‍വന്‍ഷനില്‍ രാഷ്ട്രീയ, സാമൂഹിക, സാംസ്കാരിക, സാഹിത്യ, ബിസിനസ്, മാധ്യമ രംഗങ്ങളിലെ പ്രമുഖര്‍ പങ്കെടുക്കും. കണ്‍വന്‍ഷന്‍റെ വിജയകരമായ നടത്തിപ്പിനായി വിവിധ കമ്മിറ്റികളുടെ നേതൃത്വത്തില്‍ പ്രവര്‍ത്തനങ്ങള്‍ പുരോഗമിക്കുകയാണ്.
ഫൊക്കാനയുടെ പ്രവര്‍ത്തനങ്ങള്‍ക്ക് കേരളത്തില്‍ കൂടുതല്‍ ജനപങ്കാളിത്തവും സാമൂഹിക പ്രസക്തിയും ഉറപ്പാക്കുന്നതിനുള്ള ഒരു പ്രധാന ചുവടുവയ്പ്പായിരിക്കും ഇത്തവണത്തെ കേരള കണ്‍വന്‍ഷനെന്നും ഭാരവാഹികള്‍ വ്യക്തമാക്കി.
