Times of American Malayali
Back to Home
ഡാളസ്: ഗാര്‍ലാന്‍ഡ് സിറ്റി കൗണ്‍സില്‍ ഡിസ്ട്രിക്ട് 3ലേക്ക് 2027 മേയ് 1ന് നടക്കുന്ന മുനിസിപ്പല്‍ തിരഞ്ഞെടുപ്പില്‍ പ്രമുഖ സാമൂഹിക പ്രവര്‍ത്തകനായ പി. സി. മാത്യു മത്സരിക്കും. ഇന്ത്യന്‍ കമ്മ്യൂണിറ്റിയെ പ്രതിനിധീകരിക്കുന്ന സണ്ണി മാളിയേക്കലാണ് ഇക്കര്യം ഔദ്യോഗികമായി അറിയിച്ചത്.
മേഖലയിലെ പ്രമുഖ പൊതുപ്രവര്‍ത്തകനും ബിസിനസുകാരനുമായ പി.സി. മാത്യുവിന് സിറ്റി ഭരണരംഗത്തും വിവിധ കമ്മീഷനുകളിലും പ്രവര്‍ത്തിച്ച് മികച്ച പരിചയസമ്പത്തുണ്ട്. നിലവില്‍ മേയറുടെ നോമിനിയായി ഗാര്‍ലാന്‍ഡ് ബോര്‍ഡില്‍ സേവനമനുഷ്ഠിച്ചു വരികയാണ് അദ്ദേഹം. 2022ല്‍ ഗാര്‍ലാന്‍ഡ് , ഇ കാബിലും 2024ല്‍ ഡിസ്ട്രിക്ട് 3നെ പ്രതിനിധീകരിച്ച് സീനിയര്‍ സിറ്റിസണ്‍ കമ്മീഷണറായും അദ്ദേഹം പ്രവര്‍ത്തിച്ചിട്ടുണ്ട്.
മുന്‍പ് 2021ല്‍ നടന്ന മുനിസിപ്പല്‍ തിരഞ്ഞെടുപ്പില്‍ ശക്തമായ ജനപിന്തുണയോടെ റണ്‍ ഓഫ് സ്ഥാനാര്‍ത്ഥിയായി (രണ്ടാം സ്ഥാനം) അദ്ദേഹം എത്തിയിരുന്നു. 2023ലെ തിരഞ്ഞെടുപ്പിലും സജീവ സാന്നിധ്യമായിരുന്നു. തുടര്‍ന്ന് 2025ലെ ഗാര്‍ലാന്‍ഡ് മേയര്‍ തിരഞ്ഞെടുപ്പില്‍ മത്സരിച്ച 6 സ്ഥാനാര്‍ത്ഥികളില്‍ മൂന്നാമതെത്തുകയും, റണ്‍ ഓഫ് തിരഞ്ഞെടുപ്പില്‍ വിജയിച്ച ഡിലന്‍ ഹെഡ്രിക്കിന് പിന്തുണ പ്രഖ്യാപിക്കുകയും ചെയ്തു.
ഗാര്‍ലാന്‍ഡ് സിറ്റിയുടെ ലീഡര്‍ഷിപ്പ് പ്രോഗ്രാമുകളായ ലീഡര്‍ഷിപ്പ് ഗാര്‍ലാന്‍ഡ്, സിറ്റിസണ്‍സ് പോലീസ് അക്കാദമി, സിറ്റിസണ്‍സ് ഫയര്‍ അക്കാദമി എന്നിവയെല്ലാം വിജയകരമായി പൂര്‍ത്തിയാക്കിയിട്ടുണ്ട്. റിയല്‍ട്ടര്‍, ഇന്‍ഷുറന്‍സ് ഏജന്‍സി ഉടമ എന്നീ നിലകളില്‍ പ്രവര്‍ത്തിക്കുന്ന അദ്ദേഹം വേള്‍ഡ് മലയാളി കൗണ്‍സില്‍ അമേരിക്കന്‍ റീജിയന്‍ മുന്‍ പ്രസിഡന്‍റായിരുന്നു.
നിലവില്‍ ഗ്ലോബല്‍ ഇന്ത്യന്‍ കൗണ്‍സില്‍ ഗ്ലോബല്‍ പ്രസിഡന്‍റായി പ്രവര്‍ത്തിക്കുന്ന പി. സി. മാത്യു, കേരള അസോസിയേഷന്‍, കേരള ലിറ്റററി അസോസിയേഷന്‍, ഇന്ത്യ കള്‍ച്ചറല്‍ ആന്‍ഡ് എഡ്യൂക്കേഷന്‍ സെന്‍റര്‍ തുടങ്ങിയ സംഘടനകളിലും സജീവമാണ്. ഷോര്‍സ് ഓഫ് വെല്ലിങ്ടണ്‍ കമ്മ്യൂണിറ്റിയുടെ തിരഞ്ഞെടുക്കപ്പെട്ട പ്രസിഡന്‍റായും അദ്ദേഹം സേവനമനുഷ്ഠിക്കുന്നു.
ഡാളസ് കോളേജ് പ്രൊഫസറും അമേരിക്കന്‍ സമൂഹത്തില്‍ പ്രമുഖനുമായ ബില്‍ ഇന്‍ഗ്രമാണ് അദ്ദേഹത്തിന്‍റെ ക്യാമ്പയിന്‍ ട്രഷറര്‍.
