Times of American Malayali
Back to Home
പാനമ: മധ്യ അമേരിക്കന് രാജ്യമായ പാനമയില് ആയിരം വര്ഷത്തിലധികം പഴക്കമുള്ള പുരാതന ശവക്കല്ലറ കണ്ടെത്തി. പാനമ സിറ്റിയില് നിന്ന് ഏകദേശം 200 കിലോമീറ്റര് അകലെയുള്ള 'എല് കാനോ' പുരാവസ്തു ഗവേഷണ കേന്ദ്രത്തിലാണ് ഈ സുപ്രധാന കണ്ടെത്തല് നടന്നതെന്ന് ഗവേഷകര് അറിയിച്ചു.
ശവക്കല്ലറയില് നിന്ന് ലഭിച്ച അസ്ഥികൂടത്തിന് ചുറ്റും സ്വര്ണ്ണാഭരണങ്ങളും ചിത്രപ്പണികളുള്ള മണ്പാത്രങ്ങളും കണ്ടെത്തി. ഇത് അക്കാലത്തെ ഉയര്ന്ന പദവിയിലുള്ള വ്യക്തിയുടെ കല്ലറയാണെന്ന് പുരാവസ്തു ഗവേഷകയായ ജൂലിയ മായോ വ്യക്തമാക്കി.
വളകള്, കമ്മലുകള്, വവ്വാലുകളുടെയും മുതലകളുടെയും രൂപങ്ങള് കൊത്തിയ നെറ്റിക്കണ്ണികള് എന്നിവ ഇതില് ഉള്പ്പെടുന്നു. എ.ഡി 800നും 1000നും ഇടയിലാണ് ഈ കല്ലറ നിര്മ്മിക്കപ്പെട്ടതെന്ന് കരുതപ്പെടുന്നു.
പാനമയിലെ പ്രീഹിസ്പാനിക് സമൂഹങ്ങളുടെ സംസ്കാരത്തെയും ആചാരങ്ങളെയും കുറിച്ച് പഠിക്കാന് ഈ കണ്ടെത്തല് സഹായിക്കും. മരണശേഷവും സാമൂഹിക പദവി നിലനില്ക്കുന്നു എന്ന വിശ്വാസമാണ് ഇത്തരം ആഡംബരപൂര്ണ്ണമായ ശവസംസ്കാരത്തിന് പിന്നിലെന്ന് വിദഗ്ധര് ചൂണ്ടിക്കാട്ടുന്നു.
കഴിഞ്ഞ രണ്ട് പതിറ്റാണ്ടുകളായി ഈ പ്രദേശത്ത് ഖനനം നടക്കുന്നുണ്ട്. സമാനമായ ഒന്പതോളം കല്ലറകള് നേരത്തെ ഇവിടെ നിന്ന് കണ്ടെത്തിയിരുന്നു.
.
