Times of American Malayali
Back to Home
വാഷിംഗ്ടണ്‍: അഞ്ച് സംസ്ഥാനങ്ങളിലെ ഗവര്‍ണര്‍മാരുടെ ഔദ്യോഗിക വസതികളിലും സ്റ്റേറ്റ് കാപ്പിറ്റോളുകളിലും ആദ്യമായി ദീപാവലി ആഘോഷങ്ങള്‍ സംഘടിപ്പിച്ചു. ഐഡഹോ, നെബ്രാസ്ക, മൊണ്ടാന, നോര്‍ത്ത് ഡക്കോട്ട, വാഷിംഗ്ടണ്‍ എന്നീ സംസ്ഥാനങ്ങളിലാണ് ആഘോഷങ്ങള്‍ നടന്നത്. നവംബര്‍ 10ന് ഒറിഗണിലും ദീപാവലി ആഘോഷം നടക്കും.
സീയാറ്റിലിലെ ഇന്ത്യന്‍ കോണ്‍സുലേറ്റും കമ്മ്യൂണിറ്റി നേതാക്കളും ചേര്‍ന്നാണ് ഈ ചടങ്ങുകള്‍ സംഘടിപ്പിച്ചത്. ബിസിനസ്, പൊതുസേവനം, സാംസ്കാരിക വൈവിധ്യം എന്നീ മേഖലകളില്‍ ഇന്ത്യന്‍ അമേരിക്കന്‍ സമൂഹം നല്‍കുന്ന സംഭാവനകളെ ഗവര്‍ണര്‍മാര്‍ ചടങ്ങുകളില്‍ പ്രശംസിച്ചു.
വാഷിംഗ്ടണ്‍ ഗവര്‍ണര്‍ ബോബ് ഫെര്‍ഗൂസണ്‍, ഐഡഹോ ഗവര്‍ണര്‍ ബ്രാഡ് ലിറ്റില്‍, നെബ്രാസ്ക ഗവര്‍ണര്‍ ജിം പിള്ളന്‍, മൊണ്ടാന ഗവര്‍ണര്‍ ഗ്രെഗ് ജിയാന്‍ഫോര്‍ട്ടെ, നോര്‍ത്ത് ഡക്കോട്ട ഗവര്‍ണര്‍ കെല്ലി ആംസ്ട്രോംഗ് എന്നിവര്‍ അതത് സംസ്ഥാനങ്ങളിലെ ആഘോഷങ്ങള്‍ക്ക് നേതൃത്വം നല്‍കി. ഇതിനുപുറമെ വാഷിംഗ്ടണ്‍ സംസ്ഥാനത്തെ നിരവധി സിറ്റി കൗണ്‍സിലുകളിലും മേയര്‍മാരുടെ നേതൃത്വത്തില്‍ ദീപാവലി ആഘോഷങ്ങളും ദീപം തെളിക്കല്‍ ചടങ്ങുകളും സംഘടിപ്പിച്ചിട്ടുണ്ട്.
സീയാറ്റില്‍ മേഖലയില്‍ ഏകദേശം രണ്ടുലക്ഷത്തോളം ഇന്ത്യന്‍ അമേരിക്കക്കാര്‍ വസിക്കുന്നുണ്ടെന്ന് ഇന്ത്യന്‍ കോണ്‍സുലേറ്റ് അറിയിച്ചു. ദീപാവലിയുടെ പ്രാധാന്യവും ഇന്ത്യന്‍ സമൂഹത്തിന്‍റെ സംഭാവനകളും മുന്‍നിര്‍ത്തി വിവിധ സംസ്ഥാന സിറ്റി ഭരണകൂടങ്ങള്‍ പ്രത്യേക പ്രഖ്യാപനങ്ങളും പുറപ്പെടുവിച്ചിട്ടുണ്ട്.
