Times of American Malayali
Back to Home
ചിക്കാഗോ: ബെന്‍സന്‍വില്‍ സേക്രഡ് ഹാര്‍ട്ട് ക്നാനായ കത്തോലിക്ക ഫൊറോന പള്ളിയില്‍ സകല വിശുദ്ധരുടെയും തിരുനാള്‍ ഭക്തിനിര്‍ഭരമായി ആഘോഷിച്ചു. ഇടവകയിലെ കുട്ടികളുടെയും കുടുംബങ്ങളുടെയും സജീവ പങ്കാളിത്തം ആഘോഷങ്ങള്‍ക്ക് കൂടുതല്‍ മനോഹാരിത പകര്‍ ന്നു. ആഘോഷങ്ങളുടെ ഭാഗമായി രാവിലെ 10 മണിക്ക് ക്നാനായ റീജിയന്‍ ഡയറക്ടര്‍ ഫാ. തോമസ് മുളവനാലിന്‍റെ കാര്‍മികത്വത്തില്‍ വിശുദ്ധ കുര്‍ബാന അര്‍പ്പിക്കപ്പെട്ടു. വിശുദ്ധരുടെ ജീവിതമാതൃക നമ്മുടെ കുഞ്ഞുങ്ങള്‍ക്കും കുടുംബങ്ങള്‍ക്കും വിശ്വാസത്തിലും സ്നേഹത്തിലും വിശുദ്ധിയിലും വളരാന്‍ എന്നും പ്രചോദനമാകട്ടെയെന്ന് അദ്ദേഹം ഉദ്ബോധിപ്പിച്ചു.
കുര്‍ബാനയെത്തുടര്‍ന്ന്, മതബോധന വിദ്യാര്‍ത്ഥികള്‍ തങ്ങളുടെ സ്വര്‍ഗീയ മധ്യസ്ഥരുടെ വേഷവിധാനങ്ങളണിഞ്ഞ് ദേവാലയത്തിലേക്ക് പ്രദക്ഷിണം നടത്തി. വിവിധ വിശുദ്ധരുടെ വേഷങ്ങളണിഞ്ഞെത്തിയ കൊച്ചുകുട്ടികളാല്‍ ദേവാലയം നിറഞ്ഞത് ഏറെ ഹൃദ്യമായ കാഴ്ചയായിരുന്നു. വിശുദ്ധരുടെ ജീവിതവും മാതൃകയും കുട്ടികളിലൂടെ പുനരാവിഷ്കരിക്കപ്പെട്ട ഈ കാഴ്ച വിശ്വാസികള്‍ക്ക് വലിയ ആത്മീയ സന്തോഷം പകര്‍ന്നു. ഇതില്‍ പങ്കെടുത്ത എല്ലാ കുട്ടികളെയും ഇടവക വികാരി ഫാ. എബ്രഹാം കളരിയ്ക്കല്‍ അഭിനന്ദിക്കുകയും അവര്‍ക്കുവേണ്ടി പ്രത്യേക പ്രാര്‍ത്ഥനയും ആശീര്‍വാദവും നടത്തുകയും ചെയ്തു. വിശുദ്ധരുടെ ജീവിതമാതൃക പിന്തുടര്‍ന്ന് വിശ്വാസത്തിലും വിശുദ്ധിയിലും വളരാന്‍ അദ്ദേഹം കുട്ടികളെ ഉദ്ബോധിപ്പിച്ചു. മതബോധന ഡയറക്ടര്‍ കൊളീന്‍ കീഴങ്ങാട്ടും മറ്റ് മതബോധന അധ്യാപകരും ചേര്‍ന്ന് പരിപാടികള്‍ മികച്ച രീതിയില്‍ ഏകോപിപ്പിച്ചു.
ഇംഗ്ലീഷ് വിശുദ്ധ കുര്‍ബാനയ്ക്കുശേഷം പള്ളിയുടെ പാര്‍ക്കിംഗ് ഏരിയയില്‍ കുട്ടികള്‍ക്കായി ട്രങ്ക് ഓര്‍ ട്രീറ്റ് പരിപാടിയും സംഘടിപ്പിച്ചു. ഇടവക കുടുംബങ്ങള്‍ ആവേശപൂര്‍വം പങ്കെടുത്ത ഈ പരിപാടിയില്‍ വിവിധ വാഹനങ്ങളുടെ പിന്‍ഭാഗങ്ങള്‍ വിശുദ്ധരുടെ ചിത്രങ്ങളും രൂപങ്ങളും ഉപയോഗിച്ച് മനോഹരമായി അലങ്കരിച്ചിരുന്നു. കുട്ടികള്‍ ഓരോ വാഹനത്തിനരികിലും എത്തി പ്രാര്‍ത്ഥനാ കാര്‍ഡുകളും മിഠായികളും സ്വീകരിച്ചു. വിശ്വാസവും വിനോദവും ഒത്തുചേര്‍ന്ന ഈ പരിപാടി കുട്ടികള്‍ ക്ക് ഏറെ ആസ്വാദ്യകരമായി.
