Times of American Malayali
Back to Home
തിരുവനന്തപുരം: കേരളബാങ്ക് സംസ്ഥാനത്തെ നമ്പര്‍ വണ്‍ ബാങ്കാവുമെന്ന് പിണറായി വിജയന്‍.
റിസര്‍വ് ബാങ്കിന്‍റെ മാര്‍ഗ്ഗനിര്‍ദ്ദേശമനുസരിച്ച് പ്രൊഫഷണല്‍ രീതിയില്‍ കേരളബാങ്ക് പ്രവര്‍ത്തിക്കും. സംസ്ഥാനത്തിന്‍റെ വികസന പ്രവര്‍ത്തനങ്ങള്‍ക്ക് ബാങ്ക് പങ്കാളിയാകുമെന്നും മുഖ്യമന്ത്രി പറഞ്ഞു.
കേരള ബാങ്കിന്‍റെ ആദ്യഭരണസമിതി അധികാരമേറ്റെടുത്ത ചടങ്ങിനുശേഷം മാധ്യമങ്ങളോടു സംസാരിക്കുകയായിരുന്നു മുഖ്യമന്ത്രി.
സി.പി.എം സംസ്ഥാന സമിതി അംഗങ്ങളായ ഗോപി കോട്ടമുറിക്കലിനെ കേരളബാങ്ക് ഭരണസമിതിയുടെ ചെയര്‍മാനായും എ.കെ.കണ്ണനെ വൈസ് ചെയര്‍മാനായും മുഖ്യമന്ത്രി പ്രഖ്യാപിച്ചു.
2019 നവംബര്‍ 26നാണ് സംസ്ഥാന സഹകരണ ബാങ്കില്‍ ജില്ലാ ബാങ്കുകളെ ലയിപ്പിച്ച് കേരള ബാങ്ക് രൂപവത്കരിച്ചത്. ഒരു വര്‍ഷത്തേക്ക് സഹകരണ വകുപ്പ് സെക്രട്ടറിയുടെ നേതൃത്വത്തിലായിരുന്നു ഇതിന്‍റെ പ്രവര്‍ത്തനം നടന്നത്. കാലാവധി അവസാനിച്ചതോടെയാണ് കേരളബാങ്ക് ഭരണസമിതിയിലേക്ക് പ്രഥമ തിരഞ്ഞെടുപ്പ് നടന്നത്. പ്രാഥമിക വായ്പാസഹകരണസംഘങ്ങള്‍, അര്‍ബന്‍ ബാങ്ക് എന്നിവയുടെ പ്രതിനിധികളായി 114 പേരെയാണ് തിരഞ്ഞെടുത്തത്.
