കടുത്ത നടപടികളുമായി വീണ്ടും അമേരിക്ക; വെനിസ്വേലയിലെ നാല് എണ്ണക്കമ്പനികള്ക്ക് യു. എസ് ഉപരോധം ഏര്പ്പെടുത്തി
വാഷിങ്ടണ്: വെനിസ്വേലക്കെതിരെ കൂടുതല് കടുത്ത നടപടികളുമായി വീണ്ടും അമേരിക്ക. വെനിസ്വേലയിലെ എണ്ണമേഖലയില് പ്രവര്ത്തിക്കുന്ന നാലു കമ്പനികള്ക്ക് മേല് ഉപരോധം ഏര്പ്പെടുത്തി. വെനിസ്വേലന് പ്രസിഡന്റ് നിക്കോളാസ് മദുറോയുടെ സര്ക്കാറിനെ സഹായിക്കുന്ന ഷാഡോ ഫ്ളീറ്റിന്റെ ഭാഗമെന്ന് യു.എസ് ആരോപിക്കുന്ന നാല് ഓയില് ടാങ്കറുകള് പിടിച്ചെടുക്കുകയും ചെയ്തു.
മദുറോക്കെതിരെ ട്രംപ് ഭരണകൂടം മാസങ്ങളായി നടത്തുന്ന സമ്മര്ദ പ്രചാരണത്തിന്റെ ഭാഗമാണ് ഈ നടപടി. വെനിസ്വേലന് തീരത്തുനിന്ന് രണ്ട് എണ്ണ ടാങ്കറുകള് യു.എസ് സേന പിടിച്ചെടുക്കുകയും മറ്റൊരു ടാങ്കര് പിടികൂടാനുള്ള ശ്രമത്തിലുമാണ്. കരീബിയന് കടലിലും കിഴക്കന് പസഫിക് സമുദ്രത്തിലും മയക്കുമരുന്ന് കടത്ത് ആരോപിച്ച് ബോട്ടുകളില് ശക്തമായ ആക്രമണം നടത്തി.
