Times of American Malayali
Back to Home
വാഷിംഗ്ടണ് ഡി.സി: അമേരിക്കന് പൗരത്വം ലഭിച്ച വിദേശികള്ക്ക് പൗരത്വം റദ്ദാക്കാനുള്ള കടുത്ത നീക്കങ്ങളുമായി പ്രസിഡന്റ് ഡൊണാള്ഡ് ട്രംപ് മുന്നോട്ട്. ഇത് സംബന്ധിച്ച് പുതിയ മാര്ഗ്ഗനിര്ദ്ദേശങ്ങള് പുറത്തിറക്കിയത് കുടിയേറ്റക്കാര്ക്കിടയില് വലിയ പരിഭ്രാന്തി സൃഷ്ടിച്ചിരിക്കുകയാണ്.
പൗരത്വം റദ്ദാക്കുന്നത് സംബന്ധിച്ച കേസുകള് പരിശോധിക്കാന് പ്രതിമാസം 100 മുതല് 200 വരെ കേസുകള് വീതം കണ്ടെത്താന് ഫീല്ഡ് ഓഫീസുകള്ക്ക് ട്രംപ് ഭരണകൂടം നിര്ദ്ദേശം നല്കി. മുന്പ് പ്രതിവര്ഷം ശരാശരി 11 കേസുകള് മാത്രമാണ് ഇത്തരത്തില് റിപ്പോര്ട്ട് ചെയ്തിരുന്നത്.
മിനസോട്ടയിലെ സൊമാലി വംശജരെ ലക്ഷ്യം വെച്ചാണ് ട്രംപിന്റെ പ്രധാന നീക്കങ്ങള്. മിനസോട്ടയിലെ സാമ്പത്തിക തട്ടിപ്പ് കേസുകളുമായി ബന്ധപ്പെടുത്തി സൊമാലി സമൂഹത്തെ ട്രംപ് രൂക്ഷമായി വിമര്ശിച്ചിരുന്നു. വഞ്ചന കാണിച്ചവരുടെ പൗരത്വം നിമിഷനേരം കൊണ്ട് റദ്ദാക്കുമെന്നും അദ്ദേഹം വ്യക്തമാക്കി.
മിനസോട്ടയില് നിന്നുള്ള കോണ്ഗ്രസ് അംഗം ഇല്ഹാന് ഒമര്, ന്യൂയോര്ക്ക് മേയര് സോറന് മംദാനി തുടങ്ങിയ പ്രമുഖരുടെ പൗരത്വത്തെയും ട്രംപ് ചോദ്യം ചെയ്തിട്ടുണ്ട്. 'അവരെ ഇവിടെ നിന്ന് പുറത്താക്കണം' എന്ന ട്രംപിന്റെ പ്രസ്താവനയ്ക്കെതിരെ പ്രതിഷേധം ശക്തമാണ്.
പൗരത്വം നല്കുന്ന സമയത്ത് കള്ളം പറയുകയോ വിവരങ്ങള് മറച്ചുവെക്കുകയോ ചെയ്തവര്ക്കെതിരെ മാത്രമേ പൗരത്വം റദ്ദാക്കാന് നിയമപരമായി സാധിക്കൂ എന്ന് വിദഗ്ധര് ചൂണ്ടിക്കാട്ടുന്നു. വെറും ക്വാട്ട നിശ്ചയിച്ച് പൗരത്വം എടുത്തുകളയുന്നത് കോടതിയില് ചോദ്യം ചെയ്യപ്പെട്ടേക്കാം.
പൗരത്വം റദ്ദാക്കപ്പെടുന്നവര് ഗ്രീന് കാര്ഡ് ഹോള്ഡര്മാരായി മാറുകയും തുടര്ന്ന് അവരെ നാടുകടത്താന് എളുപ്പമാകുകയും ചെയ്യുമെന്നതാണ് ഈ നീക്കത്തിലെ പ്രധാന അപകടം.
